منحة جامعة جينان لطلاب علوم الحاسب / ماجستير

كيف تقدم علي منحه شيفننج ؟ 
في المقال السابق تكلمنا عن مميزات منحة تشيفنينغ و ناس كثير شافت المميزات و قررت انها تقدم في المنحه السنه هذه
تعرف على منحة تشيفنينغ للدراسة في بريطانيا: https://goo.gl/cwtcD7
مميزات منحة تشيفنينغ: https://goo.gl/scwWtd
.
امنيه الخياط , الحاصله علي منحه تشيفنينغ وهي حاليا تدرس صحافه في جامعه برونيل في لندن 
كتبت المقال هذا اللي فيه تجميعه لمعظم الاسئله اللي وصلتنا بخصوص المنحة 
====
.
البوست دا هكتب فيه ازاي تقدم في منحة شيفيننج #Chevening المقدمة من الخارجية البريطانية لدراسة الماجسير في المملكة المتحدة لمدة سنة، وهيتضمن كل المعلومات المهمة للتقديم للمنحة. في اكيد تفاصيل صغيرة ممكن انساها في البوست بس ياريت اي استفسار عن التفاصيل دي يكون في كومنت بحيث نقدر نفيد بعض.
انا جالي رسائل كتير جدا بأسئلة متفرقة، هجمع كل الاجابات هنا بحيث الكل يستفيد،لكن ارجوكم، مهم جدا جدا جدا تدخلوا موقع المنحة وتقروا كويس وتدخلوا مواقع الجامعات اللي عاملة تعاون مع شيفيننج عشان ماينفعش اصلا تكون رايح تدرس ماجستير في جامعة بريطانية وانت ماعندكش شغف البحث والتقصي..

فأرجوكم لازم ولازم ولازم تدخلوا الموقف وتقروا كويس جدا التفاصيل ومعلومات عن المنحة أول ما تقتح.

1- منحة شيفيننج هي منحة لدراسة الماجستير لمدة سنة واحدة في المملكة المتحدة في احدى جامعات (انجلترا واسكتلندا) وهي واحدة من ارقى المنح الدراسية في العالم لأن التنافسية فيها عالية جدا، شرط من شروط المنحة انكم ترجعوا بلدكم لمدة سنتين ماتقدروش تدخلوا بريطانيا لشغل او دراسة.
2- لما بتكون حاصل على منحة شيفيننج فدا في حد ذاته اضافة للسي في بتاعك من خلال المنحة بتنضم لمجموعة من ارقى وافضل الطلبة في تخصصات مختلفة في العالم
3- الجامعات البريطانية على علم بالمنحة دي وبيحترموا الطلاب الحاصلين عليها لأن طريقة التقديم ليها طويلة والطالب بيتنقى عالفرازة فبيكون له وضع محترم
4- الجامعات الي عاملة تعاون مع شيفيننج موجودة في الصفحة دي:
http://www.chevening.org/egypt/
5- المنحة بتدفع لك مصاريف الفيزا لبريطانيا وهي بتبقى فيزة Tier 4 ودي فيزة الدراسة لبريطانيا، وعلى الفيزا بيكون ليك الجق انك تشتغل 20 ساعة اسبوعيا، اضافة لمصاريف الطيران رايح جاي ومصاريف الجامعة كاملة.
6- بتاخد مرتب شهري بيتراوح ما بين 1000 ل 1200 جنيه استرليني، ودا بيتحدد حسب انت في لندن ولا في مكان تاني لان لندن اغلى، والمرتب دا شهري وهتدفع منه ايجار السكن بتاعك لان المنحة مش بتوفر لك سكن. انت اللي بتدور بنفسك.
7- المنحة بتطلب منه IELTS Academic 6.5 ماتقلش عن 5.5 في كل باند، بس خد بالك، الجامعات غالبا هتطلب سكور أعلي من كدا، فشوف الجامعة الأول عايزة كام عشان تشتغل على السكور الأعلي.

طيب تعمل ايه عشان تقدم؟

1- المنحة السنة دي هتفتح باب التقديم من يوم 7 اغسطس لحد يوم 8 نوفمبر. تابع الموقع http://www.chevening.org/egypt/
2- لازم يكون معاك خبرة مش أقل من سنتين، حتى لو مجال دراستك غير مجال خبرتك، مش مهم، المهم تجد علاقة بين شغلك وبين اللي عايز تدرسه في بريطانيا، او بين دراستك الجامعية ودراستك في بريطانيا.. لازم يحسوا انك بتبنى فوق حاجة مش طاير في الهوا ومشتت.
3- ممكن تستغل شهر يوليو الجاري دا عشان تجهز حاجات مهمة:
• تطلع باسبور او تجدد الباسبور الحالي لو كان باقي عليه فترة قصيرة ويخلص
• تروح الجامعة تطلع شهادة تخرج بالانجليزي العربي، وشهادة بكشف الدرجات
• تجمع كل الشهادات اللي اخذتها في حياتك (دورات تدريبية- دبلومة- ماستر- شهادات تكريم...الخ)
• تزبط CV كويس بالانجليزي
• وانت في الجامعة بتاعتك، تطلع على رئيس القسم بتاعك او عميد الكلية او اي دكتور، وتخليه يكتب لك جواب توصية بالانجليزي ويكتب فيه To whom it may concern بحيث تستخدمه في كل المراحل الجاية اللي هتحتاج الجواب دا..وتخلي الدكتور يكتب ايميله ورقم تليفونه وعنوان الكلية
• تروح لرئيسك في الشغل/ المشرف/ موظف اكبر منك/ موظف له مكانة كويسة/ حد اشتغلت معاه قبل كدا، وتخليه يكتب لك جواب توصية تاني ويكون فيه ايميله ورقم تليفونه وعنوان (الشغل اوالبيت) وصفة الشخص دا.
• الجوابين دول اسمهم خطابات توصية او reference letters مهمين جدا ومهم تخلي اللي يكتبوهم يركزوا على مهارات ايجابية وكويسة عنك، الشخص اللي هيكتب خطاب الشغل مش لازم يكون من شغلك الحالي، ممكن حد اشتغلت معاه قبل كدا
• تعمل scan لكل الورق دا في فايل على الكمبيوتر سميه Chevening applications واكتب تحت كل حاجة اسمها بالانجليزي وحولها PDF
4- احنا كدا الحمدلله خلصنا جزء مهم في التقديم، طبعا لانه بيتطلب نزولك وتعاملك مع الموظفين، فصدقوني ما بعد ذلك ان شاء الله هين وسهل 😊 دلوقتي احنا في اول اغسطس، وباقي اسبوع على فتح باب التقديم، تعمل ايه؟ تدخل على الجامعات اللي موجودة في صفحة شيفيننج وهي الجامعات اللي شيفيننج عاملة تعاون معاها، انا عارفة ان الكل هيحس بالخوف والقلق،وازاي الجامعات دي هتقبلنا؟ وهيجيلك احساس بالخوف والقلق انك لا تصلح للمهمة دي.. دا شعور طبيعي جدا.. انت دلوقتي مقدم على خطوة مهمة في حياتك وفي آلاف في العالم بيحسوا الاحساس دا ..انا بقولكم انكم تقدروا، آلاف غيركم من مصر وخريجين نفس كلياتكم ونفس جامعاتكم ونفس تقديراتكم، واتقبلوا وسافروا واخذدوا ماستر.. المهم انك تكمل.. الموضوع كله ترتيب اوراق وتحديد اهداف.
5- ادخل دلوقتي على الجامعات وهات اسم جامعة جامعة، وادخل جوجل شوف صوره الجامعة بس ومكانها فين .. دا شئ لطيف وبيحفز جدا ، بعدها، اكتب في السيرش بتاع الجامعة اسم الكورس اللي انت عايز تدرسه واهم حاجة تختار Postgraduate courses وشوف الكورس دا هيفتح باب التقديم يوم ايه، لو مش مكتوب، ابعت لجامعة ايميل قولهم انك عايزهم يبلغوك بفتح باب التقديم لكورسات Postgraduate
6- لو انت حد متخصص ومهم بالنسبة لك اسم الجامعة وتخصصها، لازم تشوف الجامعة دي مشهورة بأي كلية فيها، يعني مثلا انا خريجة جامعة برونيل لندن، بدرس فيها صحافة، لكن جامعة برونيل من الجامعات اللي فيها تخصص الهندسة عالي جدا ومشهور..ابدأ دور وشوف الجامعة دي اشهر تخصصاتها ايه
7- مهم جدا تكون قدمت في 3 جامعات على الاقل قبل ما تعمل ابليكيشن شيفيننج، ليه؟ لأن ابليكيشن شيفيننج هتسألك هل انت قدمت الجامعات؟ ايه هما؟ ايه الكورس اللي هتدرسه؟ وهل اجامعة بعتت لك unconditional offer ولا لأ. والتالي، انت هتبدأ بالجامعات الاول وان كانت نصيحتي انكم تمشوا ابليكيشن الجامعات مع ابليكيشن شيفيننج بالتوازي.
8- الجامعات هتسألك ليه اخترت تدرس في الجامعة دي، شوف معلومات على جوجل عن الجامعة واهم تخصصاتها واشهر خريجينها، وخليك صريح في اجاباتك، يعني مثلا ممكن تكتب انك اخترت الجامعة دي في لندن عشان انت عايز تعيش في لندن، او اخترتها في ويلز عشان انت عايز تعيش في المنطقة دي..واي سبب تاني خلاك تختار الجامعة
9- شيفيننج هتسألك اهم سؤال، وهو غالبا اللي بيحدد اذا كانت الابليكيشن تعدي او لأ، وهو ال Personal statement ودي مساحة حرة كبيرة بتكتب فيها عن نفسك وطموحك وليه اخترت شيفيننج وناوي تعمل ايه بيها وبالماجستير. هكتب لكم بالتفصيل عن ال Personal statement لاحقا
10- عملية الاختيار في شيفيننج طويلة، السنة اللي فاتت كان فيه 45 الف ابليكيشن من العالم كله، ما تخافش، في ناس كتير بتقع عشان ورقهم مش كامل، او الابليكيشن مش مستوفية الشروط مثلا، دا لينك المدة الزمنية للاختيار والابليكيشن.
http://www.chevening.org/apply/application-timeline
11-ازاي بتتم عملية الاختيار؟
• بعد اما بتخلص ابليكيشن الجامعات، وبعدها ابلكيشن شيفننج، وخلاص عملنا submit هتستنى من شهر نوفمبر لحد أول فبراير اما يقولوا ان الابليكيشن بتاعتك عدت لمرحلة الانترفيو
• في فبراير، بيبعتوا يحددو معاك ميعاد انتفريو في السفارة البريطانية في القاهرة (او في بلد جنسيتك، حسب الباسبور بتاعك)
 
• الانترفيو هيكون من اول مارس لأول مايو
• أول يونيو بيبعتوا يقولوا لك مبروك، انت اتقبلت 😊

12- اوراقك الناقصة: 
• شيفيننح بتديك وقت انك تشتغل على الايلتس وعلى خطابات التوصية او ال reference letters ، الايلتس اخر ميعاد لأنك تعمله submit هيبقى يوم 13 يوليو 2018، وخطابات التوصية اخر ميعاد ليها يوم 27 فبراير 2018
يلا، ابدأوا من بكرة الصبح مشوار الجامعة وتجميع الأوراق، وقبل ما تقفلوا الكمبيوتر بتاعكم، اعملوا لايك لصفحة شيفيننج عشان تتابعوا كل الاخبار وتشوفوا اجابات على استفساراتكم وتشوفوا صور الدفعات اللي قبل كدا
https://www.facebook.com/officialchevening/
https://twitter.com/cheveningfco
أحمد حسني
eduyemen بالتوفيق للجميع 
شارك المنشور على السوشيال ميديا بالضغط على الروابط في الأسفل